Piše Vladek Antolaš Mastermind
Ovih par dana na minus šest me preporodilo, još samo sneg da je ostal koji dan više, ja bi bil prezadovoljen. Prolet je ono kaj najviše volim, ali prava zima je samo uvod za pravu prolet jer bez ciče zime zimogrozne nema čarolije proleti.
Kak bi čovek znal da je došla prolet ako nema prelaza od zdenog na toplo. Jednostavno nema uzbuđenja. Dok je zima mledna, ne valja ništ. Sve kaj je gmizalo na jesen, gmiže i na prolet, sve kaj je letelo na jesen, leti i na prolet, a zima je bila ta koja filtrira metilje, muve i nametnike da se malo pokopiču i da ne navale na nasade i živinu v novom ciklusu obnove prirode. Tak je toplo da ni medvedi nesu zaspali, nit je zeko majku svoju iskal, nit se potočić smrzel. Sve je naopak! Vele, plin bu poskupel, a kaj će nam na ove temperature. Pa veli ostalo ti drv v šupe. Pa kak? Pa bila mi je jedna topla zima. Smeh. Ajde izazivam zimu da malo zube pokaže radi tradicije neke i nekog reda. Malo da se trešča natešemo.
Sad opet ispada da i ja pripovedam kak stari ljudi pripovedaju, ali dok smo mi bili mali, delali smo kule od snega i iglue tu na vulice. Imali smo skijašku skakaonu na Farbarovom bregu nuz Vraničevo, a dok je zamrzlo na minus šesnaest, led je bil debel da su žmeke železne Matejakove sanjke išle do Doma zdravlja ako smo ga zalaufali v punom šprintu od Lazine hiže i ako smo sane namazali z slaninami koje smo naravno doma fkrali. Led je bil takov da ralica neje imala šanse protiv „ambulantskoga“ uspona . Nit je ralica imala šanse, niti šofer protiv nas jer smo mi ledenjače kugle napravili na vrpo i čekali da ov naide pa raspali v šajbu ako nam je štel postrugati naše sanjkalište koje je bilo centar sveta. Okupilo se navek dece ko sad da bi se mobiteli delili zabadava.
Denes se deca škližu na struju v centru, pardon, led se dela na struju, a deca se škližu na gorivo koje im daju hamburgeri i pizze. Mi smo bili pogonjeni na slaninu i grajek, grajek je bil naša booster doza, dok je pustil z riti gasa, ostal je za nami trag ko za avionima na nebu. Čisto se je megla digla kolko je bilo mlaznoga goriva od grajeka v zraku, a sana letela ko nesmrt.
Ove zime nesem videl nijednu sigu z krova, a kamoli z nosa nekomu da visi, a v moje vreme toga je bilo ohoho. Nos dok se je zalepil ili kukavice skorile znalo se da se mora doma preslačit i noge v rolj malo porinuti. Z nas se parilo ko z atomske centrale. Posle svakoga vikenda rukavic, šalov i kap bilo je na bregu više nego v robne. Nema ko neje nekaj zgubil. Kolko je bilo zdeno i kolko smo se premrzli, tolko je bilo lepše se greti i čekati da pravi pajdaš dojde na vrata i pita tvoju majku jel smeš nazad na breg. „Ali, mama, svi u na bregu!
Zakaj ja jedini ne smem nazad?“ – to nam je bila mantra koju smo popevali celu zimu i dosađivali, pak je majka morala popustiti. Lepo je bilo deci i sad na trgu se zabavljati i verujem da mame slušaju istu mantru od svojih mališana ne bi li se dokopali klizališta. Bilo je puno dece svaki dan u sezoni i vidlo se da im je lepo. Nek im je, fala bogu. A kak i ne bi kad su svetla migala ko v disku, a i svirala savršena mužika (nek se deca vuče kaj je rock&roll ), a posle vikenda je i tam okolo bilo rukavic više neg v dućanu.
Bravo za klizalište i ekipu koja je služila deci na radost. Ma možda još zima pokaže zube pa i ambulantski breg naš da zaživi i oživi.
