Limitator: Nikaj nesem tržil ov Crni petek, a ti?

Piše Vladek Antolaš Mastermind

Sve žvenji o tom kak je Vlada RH zaprav glupa jer su avijone kupili v četrtek, den prije Crnog petka, a mogli su jeftineše prejti. Ma nemremo mi prejti jeftineše…

Nek oni v naš grad dojdu po savete jer kak zgleda, mi znamo tržiti na Crni petek jer smo valjd rotore kupili te den kad več i pri Mičetincu jeden ima. 

No to neje tema.

Al kaj je zaprav taj Crni petek?

Kad bolje pogledaš, sve se mora Amerikance kopirati, pa smo od Noći veštic (Halloween) prek Božićnog ranja došli i do Crnog petka. Valentinovo i musanje z čokoladom na taj den da i ne spominjam. Negdar su za se bili Rusi krivi, sad pak Amerikanci.

Ma kad bi do kraja kopirali Amerikance, onda bi hametom popust bil sedamdeset posto na se, a ne samo na dve-tri drangulije v dučanu.

Pri nam na popustu su te den deli glivu za štomfe krpati i kratku žlicu za cipele obuvati. Našlo se po jefino i vuže za tele zvlačiti, no kome to više treba. Prava roba je navek na ceni.

Dobro, mortem nešče i nekaj kupi z tem velikem popustom, al drugi den se obudi jer i sam vidi da koj če mu vrag korito za svinje furiti, a nema ni koca ni svinje. Bilo je jeftino. To je!

Baš na Crni petek se i novi dučan v Đurđevcu rasprl. Dva su zaprav nova, svetle se ko da je Božić, mam zgledamo vekši i jakši grad.

Ak bolje razmislim, vidi mi se da se pri nas gledi na saku kunu i kupuje se jeftino i dok neje Crni petek.

Zaprav, mi imamo crne petke cele godine, i četrtke i pondeljke.

Po orginalu, Crni petek je zmišljen za tehniku, da se televizor i vešmašina jeftino domogne, a kod nas i špeceraja kakti snize. Katalogi puni jeftine, a dobre robe. Kupujemo minažu po dučane bez reda vožnje, jeftino i samo jeftino skoro pa gešenk. Al to neje zdravo. Ranimo se po akcijama i kaj dobro od tog more ziti? Kaj je zdravo dok deneš kuvat one kobasice v litru vode, a gda se skuvaju v loncu, najdeš pol litre više jer su kobasice fine vodu pustile?

Kak more krmanadlin koštati par kuna kila? Pa de je to svinče paslo? Su ga mortem ranili ko v Novem gradu prek zrcala, bez dunsta? To nekaj neje vredu dok je tak jeftino.

Ja dok vidim onoga gra trešnjara koji je došel direkt z Kirgistana, mene srce zebe, al ne zato kaj je graj skup ili jeftin, nego kaj našega više nema.

Razlika v ceni i kvaliteti se vidi ak se glede očvirki (prava roba), oni su i dalje skupi, negde i do dvesto kuna kila. To je cena, al je i roba. Da je moja baka živa, ona bi milijone okrenula kolke je očvirke nacvrla za života. Kolka je samo creva za nadevanje čurki i kobasic nastrugala na vanjglu.  A kad bi ona vidla denšnje jajce kak je se samo ne žuto rekla bi – „Odi hiti to na gnoj! Jel ne viš kak je bledo? Kokoš koja je to znesla sigurno je betežna.“

Mi nikaj ne znamo, samo dok nam zakrulji mam v dučan, nema vu vrčak. Nema mrkve i tormana v trapu.

Vrag bi ga znal jel dobro jeftino il je skupo samo skupo.

Jedino znam da nikaj nesem tržil ov Crni petek, a ti?

Vladek Antolaš Mastermind
Share on facebook
Facebook
Share on twitter
Twitter
Share on email
Email

Upišite pojam koji želite pretraživati

Na našoj stranici koristimo kolačiće (cookies) kako bismo Vam mogli pružati usluge, koje bez upotrebe kolačića ne bismo bili u mogućnosti pružati. Nastavkom korištenja stranice suglasni ste s korištenjem kolačića. PRAVILA PRIVATNOSTI