piše: Vladek Antolaš – MASTERMIND
Meni malko tupavijem dok se spomene cirkularni štrajk prosvjetara, prvo padne na pamet Josip pilar i pilenje drv. No ok, on pili na banzek, al razmete vi kaj vam velim. Cirkular i banzek mal ne isto i na banzeku se pila vrti v krug. No dobro, tak se i tej štrajk kao vrti po Hrvatske. Obični cirkular raspiljava drevo, a ov štrajkački raspiljava prava i plače naših vučiteljov. Pile oni sako malo po toj istoj temi i tu i tam nekaj z te piljevine za njih dobro zide. Dobe koji procent više i onda gase pilu. Dok nesu v štrajku bruse pilu da bude spremna ako zatreba, jer nigda ne znaš kad bu sindikat namislil novi krug cirkularnog štrajka. V Đurđevcu, kulko mi je poznato, za tu svetu stvar radničke borbe navek su pile nabrušene i naši učitelji rado podržavaju borbe za svoja prava. Ima samo jeden učitelj koji ne bere brigu oko toga, a to je naš gradonačelnik bez prava glasa. On se ne mora buniti i štrajkati nit više biti solidaren z vučiteljima od kojih se odlepil v politku jer si sam podigne plaću i to za ne malih 65%. Vele znalci da mu je sad 3300 € neto. Neto vam je ono kaj dobi na ruke, ono kaj piše na čokoladi neto, to je čokolada bez omota. No to sad neje tema.
Pitanje samoga štrajka – jel je samo radi novca ili je zbog općeg stanja v školstvu? Jel naši učitelji štrajkaju samo radi love ili već i oni vrište za upozorenje ko kolege iz Srbije? Kaj vi velite? Meni se vidi da ili su i njima plače male ko svima nama ili su cene visoke. Visoke cene z Hrvatske je vrag štel sterati isto z jedne vrste cirkularom. Bil je to cirkularni bojkot dučanov koji je brže stal neg kaj se pila zaterala. Prerezane su ipak cene kruva i sličnih dnevnih potrepština, no rado su i gramaže kruva isto raspiljene. Cirkularno je in. Ak se mene pita, ja bi vučiteljima dal sve kaj si žele. Nemrete nigda preplatiti onog ko vam decu vuči i onog ko vam decu čuva i odgaja.
Da vi samo znate kakva je to vriska i metež pod odmorima od te naše dece, bi im dali i duplo. Kak oni samo zduraju, ja bi sve to prepljuskal za pol radnoga vremena. Oni su eto još dost smireni i normalni ili pak na Normabele, a za sedative – a za to trebaju opet novce. Znači plača gore.
Ako je pak razlog štrajka poticanje dece na održavanje normalnosti kroz život koja se kod nas izgubila, ni to nema cenu. Bolje dok se gledi, normalnoga nema puno, pogledajte samo kak nas politika bombardira sad pred izbore kaj je sve normalno. Sve nenormalno je postalo novo normalno. Bucaju se i busaju ko je menje vkral i ko je menje kriv v ilegalne gradnje mesto da se veli da je krasti i zidati bez dozvola kriva stvar v društvu. Početna točka pucanja v susedne Srbije bili su studenti i akademska zajednica – jel su to kod nas baš učitelji? Nišče zdrava razuma nemre večno gledeti kak je nekaj nemormalno, a pogotovo gledeti kak neki Bogom dani ljudi ziđu vile i bazene, a vučitelji nemru ni na more sa svojim plaćama.
Jedino ako se od vučiteljov očekiva da nam decu obedaste pa da jednoga dana ni tu našu decu ne bu smetalo kak si nešče digne plaću za 65% ili kak si nešče zbetonera plažu za svoje dupe ili pak asfalta dovleće kumu pred gorice.
