piše: Vladek Antolaš – MASTERMIND
Svi samo pripovedaju o čurkami pa tak i ja, da ne budem previše ofrlje. Evo, čurke su me inspirirale na ovaj tekst. Priželjkujemo si zimu kak se spada, da se se pomrzne i da se kukci otepu i malo prerede. Svakodnevna gatanja da bi zima mogla biti jaka padaju u vodu novim danom v kojem sunce kresne na plus 14. Zazivanje belog Božića je isto tak postala tradicija, no jel bude beli, to ja ne znam nit morem predvideti. Ono kaj ja morem, to je evo promišljati i popitavati zakaj su čurke ko klasik domaće ishrane hit ove sezone. Sve je to možda zbog nostalgije jer nas miris zapečenih čurki koje cvrče v tepsiji teleportira v neka bolja vremena i v dane dok su zime stvarno bile jake. Ok, kalendarski je još jesen, ali ljudski se nadati da bu zima ipak pokucala na vrata pogotovo dok prejde Sveta Kata. Sečam se ja jednog lepog dana za vreme dok su kolinja bila „obavezna“, a svinje domaće. Taj den sem bil kod bratića v Koprivnice na Križevačke ceste, sad je to Rudešinkin breg, imali su mini kolinje za osobne potrebe.
Kak to biva, skupili se susdedi pa smo i mi kao rodbina došli. Neki pomagat, a neki ko ja pak samo omastiti brk. U tom procesu manufakture krmanadlov, slanine i očvirkov došel je red na kobasice i čurke. E tu je sad nastupila zvezda večeri, a to je bil sused Tomaž. On je bil pozvan i prozvan ko glavni i odgovorni za mešung tih delicija koje su se nadevale na čurkajzlin (čurkajzlin je naprava na koju su se punile i kobasice i čurke). Ne bi ovo nit ja zapamtil da Tomaž neje bil zidar i vidno nakresan ak me razmete. On se tak nad koritom nezainteresirano šical i solil pa papril te sve sastojke da je to čudo jedno bilo. Ja stojim sa strane i mislim si „Pa koju vražju mater bu te čovek kobasice napravil, jel samo ja vidim da je pripit i da to nemre dobro ziti?“. No, bilo kak bilo, Tomaž je pomalo solil, frfril i ostale mirodije dodaval. Sako malo je prsta smakal i lickal smesu, a medotem je redo gemište trusil. Ljudi moji dragi, bolje kobasice i čurke ja nesem v životu jel. Tak da izgled navek vara. Ljudi su prije jednostavno bili talentirani za napraviti dobre mesne stvari bez obzira jel bili zidari, šumari ili pak doktori.
Zato nam i fale ti stari dani i tradicija kolinja po hižama. Denes pak kupujemo čurke po mesnicama i v najlonu po dućanima. Kaj da vam velim, ima svakakve robe. Neki den sem kupil dva para v jedne mesnice i tak su mrtvo zgledale da bi ih najrajše mam vrnol, al me bilo sram, no izgled me je opet prevaril, bile su odlične. Odlično su čvrčale na masti skup z krumperom v tepsije. Milina za pojesti gladna braćo moja. Posle sam im samo dodal dinstanoga zelja da doživljaj bude potpun. Zelje v mojem slučaju mora biti skroz podinstano onak da mu se vuva pomalo zapeču i de koje zacrni. Najte mi kaj zameriti kaj su me na ovu temu podsetile čurke i ono malo snega koji je sprhnul neki den. A kak vi? Jel vam fale dobre čurke i dobra zima?
