Piše Vladek Antolaš Mastermind
Ne bi ja bil Mastermind da ne zmišljam kak bi svetu bilo bolje pa sam ovo krenul pisat u sjeni ovih kriznih vremena da vam nekak pomognem da čim više prišparamo i otrgnemo se nekih navika rastrošnosti. Plaše nas stalno da bude jako loše, cele dane pišu o tome po portalima i slušamo samo crne vesti i to naveliko utječe na naše opće psihičko stanje. Depresije su nam se podvlekle ko ona megla koju sem opisival zadnji put.
Predstavljam vam „Glocov poučak„. Po pričanju, Gloc je bil jeden Bjelovarčan (bokte) koji je doktoriral na šparnosti, čak je rubno bil i škrt. Gloc neje bil Novigradec, da to mam raščistimo, no da su za njega znali v Novigradu, dobil bi najmenje plaketu za Dan općine. Slobodno ovaj moj tekst kopirajte i pošljite ga na „Andrija Štampar“ da se z ovoga zvleče nacionalna strategija o šparanju energenata u borbi protiv krize.
Drva
Gloc se revno nagledal v štednjak i brojil komade drva prekrižene na ložištu i ako je bilo cepanic više od tri, vadil je viška van i špotal Maru (ženu) da preteriva. Znači, više od tri cepanice nesu potrebne v peći to si zapamtite svi.
Važno je i znati da polek peći mora biti vedrica z vodom da se prije potikanja svaka cepanica smakne vu vodu da baš ipak ne divlja jogenj vutaman.
Struja
Glocov poučak ima i za struju nekaj za reči, a to su „Dnevne“ žarulje kao najpouzdanije i najšparneše. Dnevne žarulje su zaprav stepene žarulje koje nemojte hititi v smetje nego zašarafite nekam da se samo vidi da ima žarulja jer svaka strgana žarulja špara struju i dobra je za po danu. Po kmice ionak nemate kaj delati nego se nosite spat. Ak su sobe v hiže dobro raspoređene, onda je dosta da svetli jedna žarulja v ganjku, a sva vrata lepo širom rasprete i svi dojdu na svoje. Deca zadaću nek pišu v škole ili još za dana. Malo je problem oko toga v Đurđevcu da se piše zadaća v škole jer su školu napunili pak z vrtićance pa nema obećane jednosmjenske nastave i nemru svi đaki za dana obaviti kaj treba pa sad budu doma na trošek.
Voda (topla voda)
Prvo i osnovno, probajte se kupati v zdene vode jer je to najzdraveše. Veli Gloc da je topla voda za picice, a to i Putin veli i zapravo ako nam zapre plina, on nama samo oće zdravlje. No ak baš nemrete bez tople vode, onda ciljajte kupanje dok se kuvaju makaroni pa lepo z vrućom vodom od makaronov morete zeprati lasi ili si ju v kadu nalejati da vam se zgreje voda koja je tam. Kupanje se vraća na staro i to samo nedeljom, a voda z kade se menja kvartalno.
Plin
Plina ko ima teško da bu zašparal, a i prešla su vremena onih divnih sporohodnih plinskih brojila koja su kolke Đurđevčane (pa i šire) jeftino grela u duge zimske noći. Denes gledeč smešno zvuči da se muljalo na plinu dok je bil jeftin, a ne sad dok je ovak skup. Gloc neje imal plina, ali bi vam u ovom slučaju preporučil namerno zaštopati dize na bojleru, napetati barem gazu v cev posle brojila. Svi koji se greju na plin more spasiti samo stari dobri bajpas, no sad je kesno za to jer bi se vidlo da ste friško kopali po dvoru, a inkasatori to imaju na brige.
Gasi svetlo iza sebe!
