piše: Vladek Antolaš – MASTERMIND
Na Martinje ko imendan se išlo slavljenike po selu „vezat“, sad pak se vudara porukama i objavama. Najbitneše je tog dana nekomu Martinu ili Martini čestitati imendan. Nemam pojma, ali baš svi napinju na to čestitanje baš tog dana. Zakaj se mora baš na Martinje zreči to sretan imendan i prekapati po fejsu i imeniku jel imaš koju Martinu ili Martina? Nesem primetil da je navala na Furjanovo ili da je zacvik pri čestitanju Grozdani ili Kosjenki. Dalo bi se naslutiti da mi ipak slavimo taj dan više vino i alkohol neg imendane, ali se moramo pokazati v čestitare da nas ne bi Bakus kaznil i da nam barilec ne presahne. Bolje da se čestita neg da se petlja i da se navleče cikoča vu vino. Nikome ne treba taloga v lagvu koji diši kak japine noge posle tri dana vojne vežbe za vreme JNA, a čižme neje skidal (mislim da je bila „Bilogora 78“).
Toliko o Martinju ko imendanu.
GastroMartin….
Martinje se navek naslanja na kakvu gusku ili boncek, kašu ili mlince. Ima čurki, odojka pa neki moderneši i stejke bi pekli. No štruklji su parekselans roba. Znači sve paše. No kad je cilj se samo dobro napiti, more se Martinje održati i ob kiflice i rezance z makom.
Ljudstvo i tehnika….
Veliki ciljevi zahtjevaju i velike ljudske resurse. Te den domeštranti su na ceni i tražena roba, makar su pijaneši od biskupov baš ko v prave cirkve. Znaš sam da se si rivlju v biskupe i oču biti smešni i važni pa domeštrantov pofaljeva do te mere da primaju i nepalce (znate ove z pilane koji si palce obrežu). Tehnika je pak dogurala tak daleko da se zvučniki i mikrofoni voze po bregu pa čak i light show. Da bi bilo sve kak spada evo i moje jedne litanije pa ju slobodno molite i za mene. Martinu putaru mili, nek nek nam preša navek cvili. Prema svome obečanju, napajaj nas noću danju. Osobito pak nas brani od murije ko i lani. A dok z goric rano pođem, pravo doma na prag dođem, da se ondje treznit mogu, al daj putnu prije s nogu. Pomolimo se!
Grozdek naš, od zaštopane dizne i prazne baterije na kineskoj šprici – sačuvaj nas. Od rasparanoga rukava plave kute koji zapinje za kvaku – sačuvaj nas. Od rapšicarov koji drota z plantaže znašaju za zamke – oslobodi nas. Od međaša z bazenom – oslobodi nas. Od poreza na kleti – zaštiti nas. Od kradljivcov bakreni kap z kotla – zaštiti nas. Od podrumarov bez trsa – spasi nas. Od freze bez kuplunga – spasi nas. Na napaljenu međašicu – uputi nas. Grozdek, na tvoj zagovor i trsa tvoga oca jedinoga spomeni se da nam je bistro vino i oštra radenska lek za dušu i telo, spomeni se i da vino zdura zajedno, a da žetvu slavimo. Grozdek presvetli, od politike v goricaj nas mekni jer ko bi’ tebi z desna sad je z leva, ko je išel taj je zišel, ko se odal taj se prodal , ko se fali tomu mali.
FOTO ilustracija
