piše: Vladek Antolaš – MASTERMIND
Sedim za kavom zaran i tak se menimo o općim temama s kojima budemo spasili svet. Nabrajamo o borbi z šumarijom i žirom. Kak se dobro more zaslužiti i kak su neki bili spremni pa su žira mal ne z kamijone dovlekli. No neje nam samo to bila tema, nego smo se malo dotakli ko je koga nasadil v zadnje vreme v neke ilegale v Boriku. Hah, no to sad neje tema, mada vas sigurno zanima. Nego je nešče za šankom rekel kak je jedna Jasminka z Gornji Vrtov na radiju preglasila muzilice i rasprodala krave. Pokleknula je i Jasminka To ne bi bila ni vest, nego pak pripovedaju da su to bile zadnje krave v Đurđevcu.
Znači li to da smo i službeno postali velegrad? Opisival sam vam već jemput ono dok sem o svoje pokojne susede Pepe pisal kak je ona imala krave do zadnje trune zdravlja i da je z takvim ljudima jednostavno vmrl i onaj Đurđevec kakvoga smo poznali. Otišel je i dio duše Đurđevca z svakojom hižom jedinkom za koju je grad još plaćal da se zruši. Starina se ruši i sve ide u novi tehno izgled. No vrnimo se mi na krave. Dal sam si truda i zval Đurocija, svojega osobnoga veterinara, pardon, osobnoga veterinara mojega cucka, da ga pitam kak stojimo z kravama na terenu. Veli on meni da je 24 lete veterinar i da je na početku njegve karijere v Hrvatskoj bilo 980.000 krav, a sad je jedva 100.000.
Još mi je rekel da kaj se ja čudim da nema krav jer su i hiže prazne. Pa kaj se ja čudim, dobro mi je i rekel! Naša sela su prazna, oslobođena od ljudi i stoke, pa tak je to i v Đurđevcu. Za mene je nestanak blaga iz zadnje štale veliki šok. Ono, neje mi bilo ni na pameti da je tome tak. Nekak mi je pod normalno da v poljoprivrednom kraju bivaju i krave. Govorim o malim kućanstvima, a ne o onoj nekoj velikoj firmi s početka grada koja tovi bike i tastura proizvodnju pa čak i bregove premešta. Jednom su prilikom (ima tome i 10 let) pak za šankom nekaj ljudi prigovarali da zakaj se poljoprivrednicima plaća poticaj, kak mi sve njima dajemo. Pa brate, ako poljoprivrednik na selu ima novac, imamo i mi okolo njih.
Dok selo dobro živi i ima, imamo svi. Svi majstori su obožavali iti npr. na Novo Virje delat jer seljak je navek imal živu lovu i neje pital puno kaj košta, još ti je i pišče ili tablu slanin za doma dal. De su ona zlatna vremena dok sam ja na rekonstrukciju priključkov v Miholjancu škrinju doma z racami, piščoke i krmanadlinima napunil? Jedino nam deda Dušan neje niš kuval jer je bil jako star, al je njegov sin Braco nama za gablec ostavil i iber toga (hah, al mi smo svejedno išli Ivke Pozderove jest) Ee di su ti ljudi i de su ta vremena. Ako je stvarno tak, da više v Đurđevcu nema ni jedna krava, onda sem evo stvarno žalosten, a morali bi biti i vi. Ako opet ima de koja da je zaostala, nek mi ne zameri i svakak mi javite da barem nešce z Podravskog lista dojde i naslika zadnju kravu grada Đurđevca.
