piše: Vladek Antolaš – MASTERMIND
Nemre prejti da ja o Vuzmu ne pišem. Iz pozicije „kampanjskog“ vernika tj. onog koji ide v cirkvu dok njemu paše, a ne na zapovedanu nedelju i svetke. Takvih ko ja je puno više nego redovnih mešarov. Mi idemo ili tek dok mak na konac doteramo ili baš dok su krstitke, sprevod ili svati. Neki prije, neki kesne. Neki čekaju penziju pa imaju više časa, neki tek dok im doktor veli v lice kak je na stvari i da je kraj blizu. Ostali zdravi i mlajši ipak dojdu reda radi ili im se pak presvetli nakon kakve tragedije ili velikoga straja. Ležerno mi to nekak kroz zapovedi Božje prolazimo. Možda su takva vremena. Pa i cirkva je postala liberalnija nego kaj je bila prije 30 godina. Dobro je kaj još ipak i odemo jer sve se more online obaviti čak i aplikacije za spoved ima, al to sad neje tema. Znači ipak z vremena na vreme dojdemo. Dok dojdemo, dojdemo z veseljem i na vreme, a ne da čekamo da odzvone zvona.
Aj dobro, za cirkvu je to, jer navek damo po savesti velšega milodara v škrablicu, a ono neje nas dugo bilo pa da se nadoknadi. Dok redoviti mešari oću negda i kipeca mesto dinara deti. Doživel sam ja svega dok sem bil domeštrant i v škrablice se svega moglo najti, od gumbov do sličice Životinjsko carstvo. Mi ove fele povremenih kršćana nejdemo nigdar naprv, nego se držimo kutov, vrat i pod okorušom smo, pa negda i v cintoru. Nekak si opet po duši mislimo da kaj se bumo rivali naprv, bolje da se tam babe nakelje pred oltar jer ipak su tu po cele dane. Dobro, i lekše je pratiti mešu odođač jer nigdar ne znaš doka se mora kleknuti, prekrižiti i nazad zdignuti. Mislim znamo mi, al opet se čovek spunta. Bolje se držati zadnjega reda jer ipak ak se napenaviš napre, a neje te dugo bilo, mam je v cirkve žamor jer svi se o tebi mene. Čij si, što si, kak si i de si bil celo vreme, to su pitanja koja kruže klecalima v tom slučaju.
Ajd, bumo rekli da se ovo više događa nedeljom, nedeljom ko „običnim“ cirkvenim zapovedanim danom. Slika za svetke ko Vuzem je ipak malo drugeša jer v masi sveta lekše se skriti, a i svetki nekak ipak bolje izjednače ljude. Svi postaju ipak ko braća u Kristu. To valjda i je smisao Vuzma i muke Isusove, da svi ljudi speru svoje greje i da se poravnaju pod jednim drevom rajskoga vrta za života. A fala Bogu i posle dok uskrsnu na sliku i priliku Isusekovu. Križnoga puta ima i v svetovnom životu, saki den i sve više pa ako vu velikomu tjednu i ne odemo na križni put, ne bumo puno grešni više. Zato bi se za Vuzem ipak trebalo malo naluknuti v cirkvu, da te onaj odozgor zapamti. Ne bi trebali iti v cirkvu samo zato da spuntamo babe. Ne bi trebalo iti da se samo novemi štiklami samo zvonca po cirkve, da svi zinu, nego ipak nekak skrušeno kupiti dio karte za obečano nebo i rajski život kak nas naša vera vuči. Aj jebiga, ne baš za raj, nego baram za čistilište.
Sretan vam Vuzem.
