piše: Vladek Antolaš
Negdar dok sem pil, neje tajna, zeli su mi vozačku pak sem moral šofera platiti da me voza za poslom. Svaka škola se plaća pak sem ja i tu platil. Prvo sem si pomislil da mi bude japin pajdaš Segen, koji je delal na vozačkaj, mogel nekak zriktati da mi ju vrnu, al on je samo dva put žmernul ispod jočali i pokazal mi vozačku da je na sigurnomu v njegovom ladlinu iduća tri meseca dana. Posle od kad ne pijem nesu me za vraga niti stavili, a kamoli dali puvati. Tak me moj šofer Pura vozal okolo da sem čak uspel i ženu najti jer neje bila mala stvar da imam osobnog šofera. Smeh. Negda je bil običaj dok si bez vozačke da se ne pije ta tri meseca, svi su se čuvali to vreme i onda dok se vozačka podigla onda si se moral napiti da bi ti ju mam isti dan zeli. Ja sem bil kontra ipak, kak i navek. Ja sem lepo pil tri meseca, a onda trezen podigel vozačku kak je red.
Do den denes se neje puno zmenilo nit su šme bolje. Policija i dalje napaživa aute parkirane pred birtijaj, a najviše vole stare znance koji su optomgošće ostali bez vozačke. Ok, zakon je takov, a i sigurnost v prometu na prvome mestu.
Jedina „nepravilnost“ koju sem primetil, a povlači se kroz mnoge slučajeve, oko sebe je ta da denes dok ostaneš bez vozačke, bez obzira jel brzina ili alkohol, nigdar ne znaš zapravo od kad do kad kazna traje. Neje jasno definirano i ljudi ne znaju dal si ostal bez vozačke na datum presude ili kad. Navodno se mora pogledati na mrežnim stranicama MUP-a od kad se računa vreme inače budete ko bedak bili bez auta ako se držite datuma rešenja suda, a zaprav kazna još ne teče. Znam jednoga dečeca da neje vozil dva mseseca jer je mislil da je v kazne i onda je ležerno vozil dalje, a zaprav je kazna tek krenola. Čovek posle kak je mislil da je odslužil kaznu vozil pod zabranom mesec dana, a neje ni znal.
Al eto, ruku na srce, neje jedini i to je meni zaprv smešno. Izgleda da stvarno puno ljudi gubi vozačku, a još više ima probleme z ovim peripetijama i nejasnim rešenjima. Sretno svima z tem. Kaj smo denes navčili? Ako pijete, a kanite voziti, skrivajte aute iza birtije, a ako vas ipak vlove onda posle zemite šofera i na miru pijte tri meseca. Pratite na stranicama MUP-a od kad do kad je kazna da ne zide da lupate v prazno. Samo najhrabriji nek piju i voze taj den dok dignu vozačku pa ipak ko bu njima nekaj govoril. Pravi baja ne brine, pravi baja reda kazne i nameče ih v svoj album sa slikama saobračajki i pomno čuva svaki alkotest koji je prek 2.0 promila. Ja negda nesem ni dozvolil da mi pišu 1.8, nego sem tražil ponovno puvanje da bude barem 2.0. Ak vam zemu vozačku mam zovite kuma, pajdaša ili suseda policajca da vam pomore. On vam nebu pomogel svejedno, al opet, ak nišce ne zna ko da se neje ni dogodilo. Živeli vi meni i pamet v glavu, naravno da sem se šalil dost v ovomu tekstu, jasno je sve.
DOK PIJEŠ NE VOZI!
