piše: Vladek Antolaš – MASTERMIND
Dok je bila ona plava svetlost na nebu, mene su vu taj čas „oteli“ vanzemljaci. Bil sam v Zdelicaj na bregu dok su se vrata portala rasprla direkt z Tubinoga jarka na Saturn. Vanzemljaci su došli i šteli su mi vrnoti bakrenoga kotla za rakiju kojega su mi, kak sad stvari stoje, oni fkrali z šupe prije 6-7 let. Je, sad nema mesta v šupe pa sam im rekel da si ga ostave. A ja skoro optužil jeden manjinski narod da me pokral. Pital sem ih jel su mi mortem oni fkrali i alata v Nove Gradiške, no vele nesu oni, to su ipak ovi drugi.
Tak su me poveli na vožnju svemirom. Sel sem se nuz obločec vu tem malem limenem letećem tanjeru. Zvana je te tanjer emajliran na uzorak čerešnji ili se meni samo tak činilo pri slabomu svetlu. Te tanjer tak brzo leti da smo začas bili do meseca i morem vam reči da se od celoga Đurđevca jedino vidi rotor pri Mičetincu. Svetli se kak ćelava glava na koju namerno ono malo lasev zalizava dragi vođa da prekrije nedostatak. Tak je i z tem rotorom – lepo svetli, al nas je ipak sram kaj je tu v mekote i dalje najvekša glupost koju smo zezidali. Pital sam ja vanzemljance kad tak brzo lete i imaju tehnologiju, jel bi nam povlekli brzu cestu do Koprivnice od Zagreba, pa da malo koji čošek i Đurđevca oblezne. No ne žele oni to. Ne bi se mešali jer na tom primeru oni svoju decu vuče kak se nesme. Smeje nam se cela galaksija, vele, z dva mlečna puta.
Vole oni nas posmatrati i čuditi se kaj z nama neje vredu. Evo, pitali me čemu bude služil onaj novi kružni tok oko dreva na pešačke steze v parku koji je friško osvanul tam od Zvončice prema cirkve. Dok pogleneš malo bolje, to najnoveše zdrkavanje arhitekta v Đurđevcu nemru razmeti ni zemljaci, a kamoli vanzemljaci. To je teško objasniti. Meni je prvo palo na pamet kak pe majka na biciklu v cirkvu, a da more sfrknuti z guvernalom. Dok ju još k tome zapuhne ona megla z vodoskoka koji neje vodoskok, bude se majka v krug vozila oko dreva dok se ne razvedri.
Ako budete sad srali da neje park za voziti se z biciklom, onda morate znati da je to tradicija v Đurđevcu; da se majke voze z biciklom v cirkvu. Aj pusti sad babe na biciklu, al kak bude išla prešencija oko toga dreva? Budu se cvikali ili pedu komunisti levo, a ostali desno? Projektant je kumrovečka škola jer oće zatrči domaću tradiciju i podeliti ljude ili samo nema pojma. Napravili golf terena z lepoga parka. Sterilizacija javnog prostora se nastavlja. Lepo je jer je novo i tu priča staje. Ukinute neke poprečne steze jer je vlast i dalje pametneša od naroda v Đurđevcu. Se kaj je staro i uhodano treba zatrči. Valjda povest grada prije Lacija ne postoji. Neje tajna da je ova zelena trava jako skupa jer mi nesmo kadri posejati sami travu, no ta naša ne bi zazelenela do Đurđeva pa se vlast ne bi imala z čem kurčiti pred izbore, a sve za naše novce. To vam se sve z svemira vidi!
Kak god da me svemirci otpeljali daleko, ja i dalje vidim sranja koja su nam pred nosom. Mesto da me ostave negde v svemirske maglice (nebula), vanzemljaci mene v Maglenči skipali. Onda je došel Tope, kupil mi je kavu i ja sem se obudil i videl da sem i dalje za šankom i samo fantaziram. Da mi neje svemirska prašina zašla v nos?! Fantaziram li?
FOTO ilustracija
