Evo redom navodim naslove s interneta vezano na naslovljenu temu. Pa piše „Spašavanje zemlje“, „Princ William: Spašavanje Zemlje trebalo bi biti važnije od svemirskog turizma“, „Ne pitajmo što planet može dati nama, nego što mi možemo dati planetu“, „Znanstvenici pozivaju na spašavanje planeta sadnjom stabala“ itd itd. Svi bi nekaj petljali po spasu planeta ko dok ti je negda crkel Stojadin put mora pa se mam našlo njih deset zabadati nos pod haubu. Svi bi nekaj spašavali, a dihtung na glavi je odavno prebil. Zakuvava, vodu troši, ulje hiče baš kak i naša planeta. Navodno je zemlja i nakrenjena baš isto ko te Stojadin posle kak je japa znnjem v mostec drapil i sad se vleče vu stranu ko pospani cucek i ima četiri traga. Nikad više ekoloških društava i aktivista.
Ona mala Greta hoda svetom i ima stav, putuje okolo i propoveda, al ni ona nejde peške navek i ona se z kakvem Stojadinom voza i troši resurse iste te zemlje za promociju spasa te zemlje. I za njezinem avionom se kadi i nešče pamuka namače vu vode dok joj gaće delaju. Sve u svemu, meni vam je to na globalnoj razini jedna veeelika demagogija. Sve bi mi to voleli prihvatiti, al se nišce ne bi odrekel tehnologije i komocije. Evo ja prvi nedam ovoga mobitela na koji tipkam kolumne, a znam da za litij v baterije se mora puno zemlje prekopati i vode zagaditi.
Tak bi mi svi na dva stolca sedeli. Spasili bi zemlju, a volimo deherbana više nego Isuseka videti. Spasili bi zemlju, a kresa bi z starima gumami palili dok nam se deca narode. A kaj znači to malo dima? Ako ne krenemo od sebe onda sva ekološka borba ostaje jedna velika farsa. Osim kaj je to teška i dugotrajna borba, moram vam reči da je sve to krivo postavljena teza.
Ja ne znam ko se je uopće prvi setil zreči da bi mi planeta spašavali. Bilo kojega planeta pa i zemlju. Od čega bi mi zemlju spasili? Kak? Jel bi ju z flasterom keljili ako bi se raspukla? Jel bi ju deli v rolj gret ako bi se oladela? Ili bi pak pod nju deli vročega čerepa ako kihne? Od čega bi mi nju branili? Ako mesec krene prema zemlji, jel bi ju mi z rukami branili da se ne strknu? Pa neso to dva auta na parkingu pa da mi ručnu potežemo. Boli zemlju briga za nas, mi smo njoj ko buve na cucku, ona se bu samo stresla i mi bumo otpali. Zaprav zato potresi i služe. Još kaj je najblesavije, ljudi se spremaju napraviti nastambu na Mesecu da bi odonud na Mars putovali. Mortem mislimo i Marsa spašavati kak i zemlju redno spašavamo. Dajte najte.
Onda kak smo denes navčili? Zemlja ko planet ide dalje i bez nas, nebu zemlja propala ako život na zemlji usahne. Nemamo mi nju kaj spašavati nego sebe, bilje i životinje. Spasimo život, ne brigajte za planet. Planet zemlja je kosmati kamen na kojemu se mi smicamo u svojim krugovima zablude. Možda nas samo dragi Bog more spasiti, al i to sumnjam jer koliko ga trucamo i zivkamo u molitvama za svoje prizemne probleme (dal mi Bog ovo ili ono). Spasimo život na zemlji od sad!
